"Yazeed ke baap ki qabr dekho ge?"
"Ameer Muawiya ki?" Mein foran ruk gaya. "Magar un ki qabr tou namaloom hai."
"Merey liey nahi." Mansoor bola. "Ameer Muawiya kahan dafan hain, is ke baaray mein beshter ehl-e-Damishq la-ilm hain. Siyaahatti kitaabcho'n mein bhi koi hawala nahi milta. Kisi guide se poochiey tou woh laperwaahi se kahay ga 'Us ki qabr? Sirf Allah jaanta hai.' Chunaanche mein Banu Ummayya ki tareekh mein gharq hoa aur khoj lagata hoa iss qabrustaan tak aa pohncha. Meri tehqeeq ke mutaabiq un ki qabr Hazrat Bilal ke daa'en haath per aik kachi kothrhi mein honi chahiey thi... Mein ne jab us kothrhi ka darwaza khatkhataya tou aik boorhay ne kiwaarh ke peechay se jhaaktey huay durushtgi se poocha 'Kia hai?' Mein ne kaha 'Ziyarat.' Kehney laga 'Dafa ho jao yahan koi ziyarat nahi.' Aur darwaza band ker lia. Woh qabrustaan ka chokeedaar tha aur apne betey ke humraah us kothrhi mein rehaaish pazeer tha. Jab bhi mauqa milta, mein qabrustaan ja ker boorhay ki minnat kerta keh sirf aik minute ke liey androoni hissa dekh leney do mager udher se yehi jawab milta keh koi ziyarat nahi. Bilaakhir aik roz mein ne apna card kothrhi ke ander phenka aur kaha baba ji kabhi dil paseeja tou bula lijiey ga, banda kuch raqam kharch kerney ko bhi taiyaar hai.. Taqreeban aik barss ke baad woh boorha merey daftar mein namoodar ho gaya. 'Al-Syedi Mansoor mein kabhi na aata agar majboor na hota, mujhay kuch paisoun ki zaroorat parh gayi hai, kal aa ker Ameer Muawiya ki qabr dekh lena..'
"Is ka matlab hai keh boorhay ke saath dosti ho gayi!"
"Nahi." Mansoor hasnay laga. "Mein dobara aik dost ke humraah aaya tou us ne pehchaan-ne se inkaar ker diya."
"Mein dekhta houn keh meri jaib mein kitni raqam hai aur is mein se kitni Ameer Muawiya per kharch ker sakta houn."
"Nahi ab woh nahi maanay ga... Tum merey daa'en haath per kharay rehna. Mein darwaza khatkhataa'on ga aur boorha thora sa kiwaarh khol ker mujhay dekhtey hi laan taan shuru ker de ga. Tum iss doraan kothrhi ke daa'en konay mein dekhney ki koshish kerna."
Hum maahir jaasoos banay phoonk phoonk ker qadam rakhtay dhoop mein safaid kachi kothrhi ki taraf barhay aur Mansoor ne ahishta se band darwazay per dastak di... Aik be-tarteeb daarhi wala boorha kiwaarh ke peechay dikhaayi diya aur us ne Mansoor ko dekhtey hi Arbi mein kuch na-shaaishta qism ki guftugu shuru ker di... Mein ne aerhiyaa'n utha ker Mansoor ke kandhay ke ooper se kothrhi ke ander jhaanka... Daa'en haath per kothrhi ke hujam ko nisf mein taqseem kerta aik chakaur teela dikhaayi diya. Teeley per chand ghaleez kapray paray thay, chand puraani kitaabain thien aur aik pinjra dhara tha. Pinjray mein qaid tota bari hairat se humain dekh raha tha. Us teeley per sang-e-marmar ka aik qatba bhi nasab tha jis ki ibaarat neem tareeki aur doori ki bina per parhi nahi ja sakti thi. Totay ne yakdam par pharhpharha ker aik lambi 'tein' ki aur boorhay ne darwaza band ker diya... Bay of Biscay se Sindh aur Cheen tak, Aral samundar aik taraf aur doosri sarhad darya-e-Neel, Ameer Muawiya ki saltanat.... Aik kachi kothrhi, ganday kapray, chand kitaabain aur aik tota, Ameer Muawiya ki saltanat!
Mustansar Hussain Tarrar ki kitaab 'KhanaBadosh" se iqtabaas
0 comments:
Post a Comment