Mujhay apne zabt pe naaz tha sar-e-bazm raat yeh kia hua
Meri aankh kaisay chalak gayi, mujhay ranj hai yeh bura hua
Meri zindagi ke chiraagh ka yeh mizaaj koi naya nahi
Abhi roshni abhi teergi, na jala hua na bujha hua
Jo nazar bacha ke guzar gaye merey saamnay se abhi abhi
Yeh merey hi shehr ke log thay, merey gher se gher hai mila hua
Mujhay aap kion na samajh sakay yeh khud apne dil hi se poochiey
Meri daastaan-e-hayaat ka tou warq warq hai khula hua
Mujhay ik gali main para hua kisi badnaseeb ka khat mila
Kaheen khoon-e-dil se likha hua, kaheen aansu'on se mita hua
Mujhay humsafar bhi mila koi tou shikasta haal meri tarhan
Ka'ee manziloun ka thaka hua, kaheen raastay main luta hua
Mujhay jo bhi dushman-e-jaa'n mila wohi pukhtakaar-e-jafa mila
Na kisi ki zarb ghalat pari na kisi ka teer khata hua
Humain apne gher se chalay huay sar-e-raah umr guzar gayi
Koi justujoo ka sila mila na safar ka haq hi adda hua
0 comments:
Post a Comment