Khaanay ki maez per betha, sehri kertey hoay merey zehen mein waapis gher jaanay ki film chal rahi thi...kis kis se mulaaqaat ho gi...kia kia sawaalaat kiey jaaein ge, aur kia jawabaat houn ge...kis ka chehra meri aamad se muskura uthay ga...kis ki peshaani per mujhey dekh ker salwatoun mein izaafa ho ga...kon shiddat-e-jazbaat se mujhay dekh ker chand lamhaat ko quu'wat-e-goyaayi se mehroom ho jaaye ga...kon masnooyi muhabbat ka dhong racha ker mujh se itni muddat baad aanay ka shikwa karay ga... Takhaiyul ki dorri younhi rawani se kichti kichti bohat aagay ja nikli per aik sawal ne iss dorri ko kaat diya. Kon mera maatha choom ker mujhay hazaaroun duaaein de daalay ga?! Iss ke jawab ki fehrist mein se beshhter naam ab nahi rahay. Aur unn sab naamoun ko mein ya tou kabhi na kabhi khud yaad ker leta houn ya woh naam khud apni yaad dila jaatay thay...siwaaye aik naam ke. Woh naam hai Khala Aneesa ka.
Khala Aneesa se hamari koi rishtadaari nahi thi. Na doori, na qareebi. Iss ke bawajood woh khaandaan mein sab se chotay bachay se le ker merey Tayya marhoom tak ki Khala thien. Hamaray gher se un ka gher koi dass, barra farlaang dorr ho ga. Raat ko un ke gher jaatay wehshet hoti. Rastey mein galiyaa'n itni tang thien keh koi annari banda motorcycle bhi na guzaar sakta. Za'effi mein bhi tanha rehtien...Shohar dosri biwi ke saath makaan ki ooper wali manzil mein rehta, meiney aaj tak na dekha. Aulaad thi nahi. Dou kamroun mein se aik mein khud rehtien...dosray mein Dargaah saja rakhi thi jis mein shaam ko har roz shamma roshan hoti. Dargaah sara saal sajji rehti. Gher se nikaltay waqt ager andaza ho keh shaam tak waapsi mumkin nahi tou gher ki kunji parros mein pakra detien keh maghrib ke waqt Dargaah mein shamma laga di jaaye.
Mujhay nahi yaad parta meiney kabhi Khala Aneesa ko seyaah malboos ke ilawa kisi aur libaas mein dekha ho. Majlis unki jaan thi, aur woh hamaray ilaaqay mein majlisoun ki. Jis jis ke gher bhi majlis hoti, khud Khala Aneesa ko le jaatay. Dou maheeney tou shayed woh raat ko sonay hi gher jaati houn gi. Maloom nahi kis tarhan bachat ker ke har saal aik baar woh bhi apne gher Farsh-e-Aza bichaatien, jis ki tayyari woh maheenoun pehley se ker letien.
Meri marhooma Daadi ke saath masehri per un ki nishist pakki thi. Jis ko milna hota, un se waheen mil leta. Hum bachay log school se aatay, hukam hota jaldi se khana kha liya jaaye Majlis ke douraan kisi ko nahi milay ga. Abhi dastar khuwaan per beth bhi na paatay ke hukam hota Khala Aneesa se mil ker aao pehley, baad mein moqa miley na miley. Hum Khala ko salaam kertey tou jawab mein hamara maatha chooma jata, Panjetan ke sadqay mein hamaray liey duniya-o-aakhrat ki tammam khushiyaa'n maangi jaatien, imtehaan mein kaamyaabi ke liey Ayat-al-Kursi ka wird kiya jata aur iss tammam arsay mein hamara moun Khala Aneesa ke garam haathoun mein rehta. Iss sab ke baad woh aik aur baar maathay per bosa detien. Taqreeban aisa hi sulook woh har milnay waaley se kertien.
Merey Phuphi-zaad bhai Khala Aneesa ko apni maa'n samajhtey. Unn ke paaon daabtey, akser gher ja ker unki ehwaal pursi kertey, chaaye banatay, khana pakwa ker le ker jaatay. Khala bhi bhai ko behad pyaar kertien. Maa'n ki tarhan daant bhi detien. Aik baar kisi khatoon ne Khala Aneesa se poocha keh aapka beta hai yeh? Khala ne kaha Nahi nahi, yeh Khursheed ka beta hai. Bhai ne yeh suna, chaaye choohley per hi chori aur Khala ke gher se nikal aaye. Bhai ke yeh narazgi kafi haftoun tak jaari rahi. Mein tou bas Khursheed ka beta houn! Khala gher aatien, bhai salaam ker ke chalay jaatay. Bari minnat ker ke Khala bhai ko bulwaatien, paas bithaatien, maafi maangtien. Bhai moun se kuch na boltay, bas taangain dabaanay lagtay. Kuch dair baad uth ker chalay jaatay. Phir najaanay kis tarhan beta maa'n se raazi hoa, yaad nahi. Per shuker ke raazi ho gaya, werna beta saari zindagi khud ko maaf na ker pata. Aik raat Khala Aneesa ki jo aankh lagi, tou phir dobara na khuli. Mera parcha tha, janazay mein na ja saka. Baad mein suna uss be-aulaad tanha khatoon ke janazay mein itni bheerh thi keh gorkan poochta tha yeh kisi wazeer ki maa'n ka janaza hai?
Kaisay kaisay gul khaak-nasheen hoay...
Khala Aneesa se hamari koi rishtadaari nahi thi. Na doori, na qareebi. Iss ke bawajood woh khaandaan mein sab se chotay bachay se le ker merey Tayya marhoom tak ki Khala thien. Hamaray gher se un ka gher koi dass, barra farlaang dorr ho ga. Raat ko un ke gher jaatay wehshet hoti. Rastey mein galiyaa'n itni tang thien keh koi annari banda motorcycle bhi na guzaar sakta. Za'effi mein bhi tanha rehtien...Shohar dosri biwi ke saath makaan ki ooper wali manzil mein rehta, meiney aaj tak na dekha. Aulaad thi nahi. Dou kamroun mein se aik mein khud rehtien...dosray mein Dargaah saja rakhi thi jis mein shaam ko har roz shamma roshan hoti. Dargaah sara saal sajji rehti. Gher se nikaltay waqt ager andaza ho keh shaam tak waapsi mumkin nahi tou gher ki kunji parros mein pakra detien keh maghrib ke waqt Dargaah mein shamma laga di jaaye.
Mujhay nahi yaad parta meiney kabhi Khala Aneesa ko seyaah malboos ke ilawa kisi aur libaas mein dekha ho. Majlis unki jaan thi, aur woh hamaray ilaaqay mein majlisoun ki. Jis jis ke gher bhi majlis hoti, khud Khala Aneesa ko le jaatay. Dou maheeney tou shayed woh raat ko sonay hi gher jaati houn gi. Maloom nahi kis tarhan bachat ker ke har saal aik baar woh bhi apne gher Farsh-e-Aza bichaatien, jis ki tayyari woh maheenoun pehley se ker letien.
Meri marhooma Daadi ke saath masehri per un ki nishist pakki thi. Jis ko milna hota, un se waheen mil leta. Hum bachay log school se aatay, hukam hota jaldi se khana kha liya jaaye Majlis ke douraan kisi ko nahi milay ga. Abhi dastar khuwaan per beth bhi na paatay ke hukam hota Khala Aneesa se mil ker aao pehley, baad mein moqa miley na miley. Hum Khala ko salaam kertey tou jawab mein hamara maatha chooma jata, Panjetan ke sadqay mein hamaray liey duniya-o-aakhrat ki tammam khushiyaa'n maangi jaatien, imtehaan mein kaamyaabi ke liey Ayat-al-Kursi ka wird kiya jata aur iss tammam arsay mein hamara moun Khala Aneesa ke garam haathoun mein rehta. Iss sab ke baad woh aik aur baar maathay per bosa detien. Taqreeban aisa hi sulook woh har milnay waaley se kertien.
Merey Phuphi-zaad bhai Khala Aneesa ko apni maa'n samajhtey. Unn ke paaon daabtey, akser gher ja ker unki ehwaal pursi kertey, chaaye banatay, khana pakwa ker le ker jaatay. Khala bhi bhai ko behad pyaar kertien. Maa'n ki tarhan daant bhi detien. Aik baar kisi khatoon ne Khala Aneesa se poocha keh aapka beta hai yeh? Khala ne kaha Nahi nahi, yeh Khursheed ka beta hai. Bhai ne yeh suna, chaaye choohley per hi chori aur Khala ke gher se nikal aaye. Bhai ke yeh narazgi kafi haftoun tak jaari rahi. Mein tou bas Khursheed ka beta houn! Khala gher aatien, bhai salaam ker ke chalay jaatay. Bari minnat ker ke Khala bhai ko bulwaatien, paas bithaatien, maafi maangtien. Bhai moun se kuch na boltay, bas taangain dabaanay lagtay. Kuch dair baad uth ker chalay jaatay. Phir najaanay kis tarhan beta maa'n se raazi hoa, yaad nahi. Per shuker ke raazi ho gaya, werna beta saari zindagi khud ko maaf na ker pata. Aik raat Khala Aneesa ki jo aankh lagi, tou phir dobara na khuli. Mera parcha tha, janazay mein na ja saka. Baad mein suna uss be-aulaad tanha khatoon ke janazay mein itni bheerh thi keh gorkan poochta tha yeh kisi wazeer ki maa'n ka janaza hai?
Kaisay kaisay gul khaak-nasheen hoay...
0 comments:
Post a Comment