Ro keh roz-e-qatl Ameer-e-Arab hai aaj
Peeto keh roz-e-hashr hai ghurbat ki shab hai aaj
Bazm-e-Azza main aa ke na rona ghazab hai aaj
Ghum se Hassan(as) Hussain(as) ki haalat ajab hai aaj
Paya jo mehev-e-bandagi-e-beneyaaz main
Talwaar rozadaar ko mari namaz main
Sajdey main Sher-e-Haq ka dopara hua jo sar
Ik baar kaanpne lagay masjid ke baam-o-dar
Ubla l'huu keh ho gayi mehraab khuu'n se tar
Ik zalzala sa bas hua naazil zameen per
Gerdoo'n pe Jibreel pukara ghazab hua
Sajdey main haq ke qatl Ameer-e-Arab hua
Pohnchi jo gosh Hazrat-e-Zainab(sa) main yeh sada
Ro ker janab Shabbar(as) o Shabeer(as) se kaha
Jao Khuda ke waastey masjid main tum zara
Kehta hai koi qatl huay Shah-e-LaFatah
Kis ne kiya shaheed Imam-e-Hijaaz ko
Baba abhi tou gher se gaye thay namaz ko
Yeh sun ke doray janib-e-masjid Hassan(as) Hussain(as)
Dekha keh ro rahay hain namazi ba shor-o-shaen
Aur khoo'n main apnay lot-tey hain Shah-e-Mashraqain
Sar apna peetney lagay Zehra(sa) ke noor-e-ain
Gham se kalaijey dono ke seenoun main phat gaye
Chilla ke haaye Baba kaha aur lippat gaye
Hazrat ke gird jama thay ashaab bawafa
Farmaatay thay har ik se aansu baha baha
Tum se Wasi Rasool(saww) ka hota hai ab juda
Woh pooch levey aaj jisay jo ho poochna
Ghum main hamaray khaak saroun per urrao ge
Kal kh'vish-e-Mustafa(saww) ko na duniya main pao ge
Ki uth ke Sa'sa bin Sehbaa'n ne arz tab
Khatir mein kuch maslay hain ya Sheh-e-Arab
Jab chaha is ko poochoun tou maana'a hua adab
Detey hain hukam aap tou kerta houn arz ab
Khaadim umeedwaar hai is ke jawab ka
Adam(as) ka martaba hai siwa ya janab ka
Sar ko jhuka ke Sher-e-Khuda ne diya jawab
Aata hai mujh ko apni sana kerney se hijaab
Gandum ke khaanay se wo huay murid-e-ataab
Main ne baghair mana, kiya us se ijtenaab
Faaqoun main shuker haq se zabaa'n aashna rahi
Naan-e-jawee'n hamesha Ali(as) ki ghiza rahi
Ki arz us ne ro ke keh Aye Shah-e-LaFatah
Rutba zyada aap ka hai ya keh Nuh(as) ka
Farmaya jab keh ummat-e-sarkash ne ki jafa
Ki haq main un ke Nuh se saabir ne badd-dua
Baandha sitamgaroun ne gala resmaa'n se
Main ne dua-e-badd na kabhi ki zabaan se
Aur dosray saeed na tha Nuh(as) ka pisar
Kaafir raha sada na hua dee'n se behrawar
Merey pisar Rasool(saww) ke hain para-e-jigar
Yeh dono laal arsh-e-Ilaahi ke hain gohar
Sardaar-e-Ahl-e-Khuld hain aali maqaam hain
Nana nabi hain baap imaam aap imaam hain
Phir us ne arz ki keh ghulaam aap per nisaar
Qadr aap ki siwa hai keh Musa(as) ka iqtadaar
Farmaya unko jab hua yeh hukam-e-Kirdgaar
Firon paas ja ke karo haal aashkaar
Ki arz khauf yeh hai keh jeeta na aaon main
Ger hukam ho tou bhai ko bhi le ke jaaon main
Mujh se Rasool(saww) pak ne jis dam kahi yeh baat
Haan ja ke Ahl-e-Kaaba main parh Surah-e-Baraat
Thay jama waa'n bohat se sitamgar badsifaat
Laya baja main hukam-e-Shehnshah-e-Kainaat
Surah parha Baraat ka iss izz-o-shaan se
Aati thi marhaba ki sada aasmaan se
Jab toor per assa hua Musa(as) ka azdaha
Musa issay utha le hua hukam-e-Kibriya
Woh dar gaye yeh tha bashariyat ka iqtaza
Ghair az Khuda kisi se kabhi main nahi dara
Haider laqab mila mujhay tifli ke ehed main
Do ungliyoun se cheera hai azder ko nehed main
Essa(as) ko us ne poocha tou Mola ne yeh kaha
Maader hai unki Hazrat Maryam(sa) si paarsa
Jab dard waz'a-e-hamal unhain Kaabay main hua
Aayi nida-e-ghaib keh baahir yahan se ja
Yaa'n koi amr gher ibaadat rawa nahi
Taa'at ki yeh jagah hai wiladat ki jaa nahi
Aur waqt aaya meri wiladat ka jis ghari
Maader meri dua ke liey Kaabay mein gayi
Baahir se Fatima(as) ko sada yeh kisi ne di
Aa ander aa tu Kaaba ke Aye Maader-e-Ali
Maryam se martaba bara iss dam ziyaad hai
Tu hai kaneez khaas Ali(as) khana zaad hai
Rotay huay widaa huay Sheh ke doostdaar
Zainab(sa) balaaein leney lagi ro ke zaar zaar
Baitoun se tab yeh kehney lagay Shah-e-Zulfiqaar
Aao merey qareeb keh hai waqt-e-ehtzaar
Yeh sun ke rotay rotay dam unkey ulat gaye
Bara pisar Ali(as) ke qadam se lippat gaye
Roay Ali(as) Hassan(as) ko galay se laga laga
Aur haath un ke haathoun main nou baitoun ka dia
Abbas(as) naamdaar ke haq main na kuch kaha
Chupke kharay thay saamnay aur rang zard tha
Paas adab se baap ke kuch keh na saktay thay
Maa'n unko dekhti thi woh moun maa'n ka taktay thay
Ummul Baneen(sa) qadam pe giri kholay sar ke baal
Ki arz Ya Ali(as) Wali Sher-e-Zuljalaal
Abbas(as) se hai khaatir aqdas pe kuch malaal
Loundi houn main ghulaam hai Hazrat ka mera laal
Rehta na khidmat-e-Hassan-e-khush sifaat main
Haath iss ghulaam ka na diya un ke haath main
Ummul Baneen(sa) se ro ke Ali(as) ne kahi yeh baat
Deta Hassan(as) ke haath main kionker main unka haath
Sheeda terey pisar ka hai Shabeer(as) khush sifaat
Aur aashiq-e-Hussain(as) hai Abbas(as) naik zaat
Shaan-e-Bahaduri hai terey noor-e-ain main
Is ka azal se haath hai dast-e-Hussain(as) main
Abbas(as) ko bula ke galay se laga liya
Haath uska de ke haath main Shabeer(as) se kaha
Aye laal yeh ghulaam tumhara hai bawafa
Meri tarah se pyaar issay kijiyo sada
Aafat ka din jo tujhko muqaddar dikhaaye ga
Us roz yeh ghulaam bohat kaam aaye ga
Abbas(as) se kaha sun aye merey nou nihaal
Tu hai Ali(as) ka laal woh hai Mustafa(saww) ka laal
Rakhiyo hamesha khaatir Shabeer(as) ka khayal
Is ka malaal Ahmad-e-Mursal(saww) ka hai malaal
Pesh Khuda buzurg hai rutba Hussain(as) ka
Mujhko bhi paas rehta hai iss noor-e-ain ka
Bachoun samait jab yeh watan se karay safar
Pehley merey Hussain(as) se tu baandhiyo kamar
Pohnchay jo Karbala main yeh sultaan-e-beher-o-bar
Khaimay ki choki shaam se tum dijiyo ta seher
Roz nabard maarka araayi kijiyo
Paani ho iss pe band tou saqqaayi kijiyo
Yeh sun ke saari beebiyaan roti thien zaar zaar
Aur lot-tey thay khaak pe Zehra(sa) ke gulezaar
Do din talak Ali(as) rahay bister pe beqaraar
Farzandoun ko galay se lagaatay thay baar baar
Aansu bhi rawaa'n thay kabhi labb per aah thi
Ikeesvee'n shab aayi tou haalat tabah thi
Ik baar ghash se chonk ke baitoun se yeh kaha
Baghloun mein haath de ke uthaao mujhay zara
Aatay hain merey lainey ko jannat se Mustafa(saww)
Yeh baat keh ke ghash huay phir Shah-e-LaFatah
Kuch raat baqi thi keh jaha'n se guzar gaye
Ghul parh gaya keh Haider-e-Karrar mar gaye
Kehta tha koi mar gaya Ahmed(saww) ka janashee'n
Kehta tha koi toot gaya aaj rukun-e-dee'n
Dam se Abu Turab ke thi ronaq-e-zamee'n
Afsoos be charaagh hoi bazm-e-mominee'n
Aalam ke sar ka taaj zamanay se uth gaya
Hadi hamara aaj zamanay se uth gaya
Us shor main yeh Fatima(sa) ki aati thi sada
Bachay merey yateem huay wa museebata
Waris na koi Zainab o Kulsoom(sa) ka raha
Maa'n mar chuki thi aagay hi Baba bhi ab mara
Bachoun ko thaamtey hain jo maa'n baap hotay hain
Kaisay bilak bilak ke merey laal rotay hain
Bas aagay aye Anees nahi taaqat-e-raqam
Hai ashk raiz safha-e-qirtaas per qalam
Taari hai shiaan-e-Ali(as) per hujoom-e-gham
Ker tu dua yeh haq se keh jab tak hai dam main dam
Jaari zubaan per na koi aur harf ho
Maddahi-e-Ali(as) main meri umr sarf ho
0 comments:
Post a Comment