Ae Ishq na cherh aa aa ke humain
Hum bhooley huo'on ko yaad na ker
Pehley hi bohat naashaad hain hum
Tu aur humain naashaad na ker
Qismat ka sitam hi kam nai kuch
Yeh taza sitam ijaad na ker
Youn zulm na ker bedaad na ker
Ae Ishq humain barbaad na ker
Jis din se miley hain dono ka
Sab chaen gaya aaraam gaya
Chehroun se bahaar-e-subah gayi
Aankhoun se farogh-e-shaam gaya
Haathoun se khushi ka jaam chuta
Hontoun se hansi ka naam gaya
Ghamgee'n na bana naashaad na ker
Ae Ishq humain barbaad na ker
Raatoun ko uth uth ker rotay hain
Ro ro ker duaaien kertey hain
Aankhoun mein tassavur dil mein khalish
Sar dhuntey hain aahain bhertey hain
Ae Ishq yeh kaisa rog laga
Jeetey hain na zaalim mertey hain
Yeh zulm tou ae jallad na ker
Ae Ishq humain barbaad na ker
Yeh rog laga hai jab se humain
Ranjeeda houn mein beemaar hain woh
Har waqt tapish har waqt khalish
Bekhuwaab houn mein bedaar hain woh
Jeenay se idher bezaar houn mein
Marnay pe udher taiyaar hain woh
Aur zabt kahay faryaad na ker
Ae Ishq humain barbaad na ker
Jis din se bandha hai dhaiyaan tera
Ghabraaye huay se rehtey hain
Har waqt tassavur ker ker ke
Shermaaye huay se rehtey hain
Kumhlaaye huay phoolun ki tarhan
Kumhlaaye huay se rehtey hain
Pamaal na ker barbaad ne ker
Ae Ishq humain barbaad na ker
Bedard zara insaaf tou ker
Iss umr mein aur maghmoom hai woh
Phooloun ki tarah naazuk hai abhi
Taaroun ki tarah maasoom hai woh
Yeh husn-e-sitam yeh ranj-e-ghazab
Majboor houn mein mazloom hai woh
Mazloom pe youn bedaad na ker
Ae Ishq humain barbaad na ker
Ae Ishq Khudaara dekh kaheen
Woh shokh hazee'n badnaam na ho
Woh maah-e-laqa badnaam na ho
Woh zohra jabee'n badnaam na ho
Namoos ka us ko paas rahay
Woh parda nashee'n badnaam na ho
Us parda nashee'n ko yaad na ker
Ae Ishq humain barbaad na ker
Umeed ki jhooti jannat ke
Reh reh ke na dikhla khuwaab humain
Aainda ke farzi ishrat ke
Waadey se na ker betaab humain
Kehta hai zamana jis ko khushi
Aati hai nazar kamyaab humain
Chor aisi khushi ko yaad na ker
Ae Ishq humain barbaad na ker
Kia samjhey thay aur tu kia nikla
Yeh soch ke hi hairaan hain hum
Hai pehley pehel ka tajurba aur
Kam umr hain hum anjaan hain hum
Ae Ishq Khudaara rehm-o-karam
Masoom hain hum naadaan hain hum
Naadaan hain hum naashaad na ker
Ae Ishq humain barbaad na ker
Woh raaz hai yeh ghum aah jissay
Paa jaaye koi tou khair nahi
Aankhoun se jab aansu behtey hain
Aa jaaye koi tou khair nahi
Zaalim hai yeh duniya dil ko yahan
Bhaa jaaye koi tou khair nahi
Hai zulm magar faryaad na ker
Ae Ishq humain barbaad na ker
Do din hi mein ehd-e-tiflee ke
Masoom zamaaney bhool gaye
Aankhoun se woh khushiyaan mit si gaien
Lubb ke woh taraanay bhool gaye
Un paak behishti khuwaaboun ke
Dilchasp fasaaney bhool gaye
Inn khuwaaboun se youn aazaad na ker
Ae Ishq humain barbaad na ker
Iss jaan-e-haya ka bas nahi kuch
Bebas hai paraaye bas mein hai
Bedard diloun ko kia hai khabar
Jo pyaar yahan aapas mein hai
Hai bebasi zeher aur pyaar hai ras
Yeh zeher chupa iss rus mein hai
Kehti hai haya faryaad na ker
Ae Ishq humain barbaad na ker
Aankhoun ko yeh kia aazaar hua
Har jazb-e-nihaa'n per ro dena
Aahang-e-tarab pe jhuk jana
Aawaz-e-fughaa'n per ro dena
Barbat ki sada per ro dena
Mutrab ke biyaan'n per ro dena
Ehsaas ko ghum bunyaad na ker
Ae Ishq humain barbaad na ker
Ji chahta hai ik dosray ko
Youn aath peher hum yaad karain
Aankhoun mein basaaein khuwaaboun ko
Aur dil mein khayaal aabaad karain
Khilwat mein bhi ho jalwat ka samaa'n
Wahdat ko dooyi se shaad karain
Yeh aarzu'ain ijaad na ker
Ae Ishq humain barbaad na ker
Duniya ka tamaasha dekh lia
Ghumgeen se hai betaab se hai
Umeed yahaan ik wehem si hai
Taskeen yahaan ik khuwaab si hai
Duniya mein khushi ka naam nahi
Duniya mein khushi naayaab si hai
Duniya mein khushi ko yaad na ker
Ae Ishq humain barbaad na ker
Akhtar Shiraani
0 comments:
Post a Comment