Woh haqeeqi mard-e-momin, pekar-e-azm o sabaat
Jis ne thokar se ulat di Bu-lahab ki kaainaat
Zaamin-e-azm-e-Payamber ban gayi jis ki hayat
Jis ke bachoun ki wirasat thay jahaa'n ke moajzaat
Jis ne rakh li aabro insaaniyat ke naam ki
Jis ne lut ker parwarish ki natawaa'n Islam ki
Jis ki aaghosh-e-muhabat main pali paighambri
Jis ne bakhshi aadmiyat ko falak tak bartari
Dafan ker di jis ne istabdaad ki ghaaratgari
But-tarashi, but-parasti, but-nawazi, but-gari
Jis ne bakhshi thi tujhay touqeer-e-irfaa'n yaad ker
Aye Bani Adam, Abu Talib (as) ke ehsaa'n yaad ker
Woh nigehdaar-e-Muhammad(as), woh nigehbaan-e-Haram
Woh jhulastaay regzaaroun ke liey abr-e-karam
Woh Arab zaadoun ke lehjey main anees-e-mohtaram
Woh shabistaan-e-risaalat main charaaghaa'n ka bharam
Aaya-e-Tat'heer jis ke gharaanay ke liey
Jis ki naslain kat gaien haq ko bachanay ke liey
Jis ke sang-e-dar pe jhukti ho zamaanay ki jabee'n
Jis ka pekar hai Paighamber(as) ki sadaqat ka amee'n
Jis ki qurbat main sakoo'n paaye Imam-ul-Mursalee'n
Woh bhatak jaaye rah-e-Haq se?Nahi, mumkin nahi
Us ki hasti ko Khuda ki shaan kehna chahiey
Us ki jaan ko mehwar-e-Imaan kehna chahiey
Jis ne har mushkil main ki ho waris-e-dee'n ki madad
Jis ki gard-e-pa ko choomay Fatima bint-e-Asad (as)
Jo Ali(as) se Mehdi-e-dee'n(as) tak imaamat ki ho jad
Jis ke betey ko mili ho Qul-e-Imaa'n ki sanad
Kon kehta hai keh us ke dil main jazb-e-dil na tha?
Kon kehta hai keh woh khud momin-e-kamil na tha?
Jis ki peshaani ka bal, mouj-e-gharoor-e-kirdgaar
Jis ke abroo ka gumaa'n ho gardish-e-lael wa-nahaar
Woh Yad-Ullah ka pidar, woh Mustafa(as) ka iftakhaar
Jis ko dharti per mila ho mufleesi main iqtedaar
Jis ke potay ka zamee'n per muqtaddi Essa(as) banay
Kia kahoun mehsher main us ka rutba kia kia banay?
Woh sha'oor-o-ilm-o-hikmat ka haqeeqi imtazaaj
Jis ki farq-e-naaz per jachta ho sardaari ka taaj
Ye bhi kia kam hai bashar ki aadmiyat ka mizaaj
Aaj tak 'Shaeb-e-Abi-Talib' ko deta hai kharaaj
Kis ko andaaza hai us ki azmat-e-imaan ka
Baani-e-Islam khud mamnoon hai Imran(as) ka
Aye mo'arikh waqt ke moaziz kirdaaroun se pooch!
Pooch, tareekh-e-Arab ke sab sitamgaaroun se pooch!
Karbala main toot-ti be-louch talwaaorun se pooch!
Shaam ki galyoun se, chouraahoun se, bazaaroun se pooch!
Zuriyat kis ki yazeedi hosloun per chaa gayi?
Kis ki potti zulm-o-istabdaad se takra gayi?
Bol aye tareekh ke zinda asooloun ki zubaa'n
Kis ke baam-o-dar se takraati rahi hain bijliyaa'n?
Kon baatil ke muqaabil aaj tak hai kamraa'n?
Soo'ay Kufa pa-bajoulaa'n tha woh kis ka kaarwa'n?
Kis ne sadmoun ko sada di haq-pasandi ke liey?
Kis ka gher ujra tha dee'n ki sar-bulandi ke liey?
Selected stanzas from Mohsin Naqvi's "Nigehbaan-e-Risaalat"
2 comments:
SubhanAllah. *goosebumps*
P.S. Jis ke sang-e-dar pe 'jhulti' ho zamaanay ki jabee'n...
'JhuKti'.. Typo, perhaps?
Oops. Yes,typo. Corrected now. :)
Post a Comment