Aisa nahi hai keh zindagi main ab dushwaariyoun ka saamna hai tou maazi ke nakhlistaan sata rahay hain, aur aisa bhi nahi hai keh koi waaqiya ronuma hoa ho jis se zehen main posheeda yaadoun ka sandooq khula ho. Bas faqat itna hai keh kafi roz se reh reh ker, bilawajah, baat be baat, maazi ki haseen yaadain zehen ke dareechoun per madham madham dastak de rahi hain...kuch is andaaz se keh chaltay hoay qadam dam bher ko nahi ruktay, kaam kartay haath koi khallal mehsoos nahi kertey, per kaafi dair se sillay, ghair-mutaharik hont chand ghariyoun ke liey muskuraahat se aashna ho jaatay hain.
Ramzan tammam duniya ke musalmaanoun ke liey Jannat ki wa'eed le ker aata per bachpan main, mujhay Ramzan se aik shikaayat hoti. Mujhay dhool ki awaaz se shadeed dar lagta. Raat ke kisi peher jab Dhol Wala muhaalay main dhol peet-ta daakhil hota tou us ki dhamak merey nanhay se dil per dehshat paida kerti aur main Amma Abba ke darmiyaan, bister main aur dabak jaata. Razaayi sar tak ker leta. Amma uth ker kamray se jaatien tou chahtay hoay bhi na rok pata aur udher woh zaalim Dhol Wala aur qareeb aa raha hota. Abba ka ro'b, dhol ki wehshatnaak thaap ke aagay haar jata aur main yaklakht uchal ker Abba ke behad qareeb ho jata. Kabhi kabhi iss uchalnay se Abba bhi bedaar ho jatay, merey gaal per apna garam, shafqat bhara haath phertey aur phir aankhain band ker letey.
Eid hum sab apnay Tayya ke kartay jo Jaranwala muqeem thay. Bachoun ko shayed hi itna uns kisi aur se hota ho jitna bakroun, dumboun se hota hai. Aik baar main Eid ki subah so ker utha. Chappal pehnay baghair hi baahir baagh main apnay bakray ki ziyaarat ko pohancha. Kia dekhta houn keh qassayi bakray ke sar-bureeda tan ko darakht se latka raha hai. Main waheen phoot phoot ker ronay laga. Sarpat ander dora Tayya ke paas aur un se lippat ker hichkiyoun main shikayat kerney laga "Us banday ne mera Bakka (bakra) tor dia! Us banday ne mera Bakka..." Jaranwala se buhteri yaadain jurri hain. Sardiyoun ki chuttiyaa'n bhi waheen guzartien. Subah sawerey Tayyi ke haath ke banay parathay, desi ghee aur cheeni ke saath khaanay ka lutf hi alag tha. Hum sab bachay rasoyi main, Tayyi ke gird peerhiyoun per baith jaatay. Woh taway se garma garam parathay utaar ker hum bhookoun ko diey jaatien aur hum masoom katooroun ki maanind sab chat ker jaatay. Tayya nehaayat shafeeq thay. Shaam ko un ke aanay se kuch dair pehley, hum sab baagh main darakht per charh jaatay aur tiktiki baandhay uss kachhi sarak ko dekhay jaatay jis ke dosray sirray se Tayya kuch dair baad apni cycle per namoodar hotay. Sab bachay unhain pukaarnay lagtay. Phir darakht se utartay aur gher ke baagh se nikal ker aandha dhund Tayya ki jaanib bhaagtey. Sab ki khaahish hoti keh woh sab se pehley Tayya se ja liptain.
Garmiyoun ki shaam thi. Bijli chali gayi aur main ne andherey main khud ko chot laga li. Kahan lagi, ab yaad nahi. Zaar-o-qataar ronay laga. Tayya apni goud main utha ker baahir le gaye.Colony main makaanoun ki do-tarfa qataar ke beechoun beech ghaas phoons aur be-haiyat darakhtoun ka aik silsila tha jo door tak chala gaya tha. Tayya, mujhay goud main uthaaye, us ghaas phoons ke saath saath tehelney lagay. Main uss surmayi shaam main, kisi aur ke saath us jagah hota tou sehem jaata, per main Tayya ke mazboot aur shafeeq baazuoun main tha. Andhera dheerey dheerey utarnay laga aur phir najaanay kahan se un darakhtoun ke darmiyaan sainkaroun jugnoo aa ker jagmag jagmag karnay lagay. Merey chehray per hairat aur khushi ke milay julay aassar daikh ker Tayya un darakhtoun main ghus gaye aur main un ki goud se hi jugnoo pakarnay ki nakaam koshish main apni saari chotain bhool gaya.
Kuch baray hoay tou patangbaazi ka junoon ki hadd tak shoq ho gaya. Amma Abba ki daant dapat ne bhi is shoq main kuch kami na ki. Gher main sab baray dopeher ke khaanay ke baad qelola karnay ke paband thay. Humain bhi bister main dabaknay ka hukam milta aur hukam ki tameel bhi hoti...magar sirf dosroun ke aankh lagnay tak. Jaisay hi yaqeen hoa keh ab sab so chukay, main dabbay paaon zeena charhta aur June, July ki tapti dopeherain bhi mujhay dor aur patang se judda kerney main nakaam rehtien. Ghar se kuch faaslay per aik buland paani ki tunki thi. Koi paech lagaanay wala na hoa tou us tunki per bethay parindoun ko patang se tang kerney laga. Saari saari dopeher is hi shughal main beet jaati. Dhoop se rang siyaah ho jata. Tilwaar jaisi taiz dhaar dor ungliyoun ko taar taar ker deti. Mehboob ki jafakaariyaa'n lazzat-bakhsh hoti hain, aur woh zaalim dor abhi bhi meri mehboob hai.
Tayya retire hoay, tou Abba ne Lahore bulwaya liya. Itna bara gher bhalla kis kaam ka! Go keh Tayya ke teenoun baitay hum sab bachoun se baray thay, per tab bhi un ke hamrah bohat lutf aata. Pehley hum do bhai hotay cricket khelno ko, ab teen ka izaafa ho gaya. Kabhi pataangbaazi ho rahi hai tou kabhi gaindbaazi, ballaybaazi. Kabhi raat ko ghoomnay jaya ja raha hai, tou kabhi Abba se chup ker VCR per koi film dekhi ja rahi hai. Jo kaam hum Abba se dartay na ker saktay, ab Tayya-zaadoun ki aarh main ker letey. Chatt per kamray thay, jin ke khirkiyaa'n naazuk sheeeshoun ki thien. Hum haftay main kam-az-kam aik sheesha tou zaroor tor detey. Kabhi cricket kheltay hoay, kabhi football kheltay hoay. Abba dekhtey tou shaamat aati, jhirkiyaa'n partien, per hum shaitaan zyada assar na letey aur sheeshay tootnay ka silsila joun ka toun jaari rehta.
Ghar ki chatt se mera shuru se hi khaas taaluq raha. Khaila bhi chatt per, perha bhi chatt per. Sardiyoun ki dhoop main kinno bhi chatt per. Chatt se Minaar-e-Pakistan, Badshaahi masjid ke minaar, Data Darbaar ke minaar aur dosray tareekhi-o-mazhabbi muqaamat nazar aatay, jo waqt ke saath saath barhti hoi abadi aur gard-o-ghubaar ke baais nazar aana band ho gaye. Jab kabhi barish ke baad matla saaf hota tou door...gharoun ki chattoun ke ooper un shahkaaroun ki mojoodgi ka mubham se shaaiba hota. Aik dopeher khoob barish baras rahi thi. Main hasb-e-mamool chatt per chaajoun barastay baadal ke mazay le raha tha. Achanak kuch door hi aik koothay per nazar pari tou kia dekhta houn aik larki duniya jahaan se bekhabar barish main bheegti hoyi, naachnay main magan hai. Woh aik bohat hi be-hangam raqs tha. Aik tanha, barish main bheegti larki ka romaan angaiz khayal, kisi bhi larkay ke zehen main bhonchaal laanay ke liey kafi hai. Magar umer ke uss dor main mera zehen pak tha. Kisi behooda wahiyaat khayal ne zehen ki jheel ko paraganda na kia tha. Main bohat ishteyaaq se uss chulbuli larki ko taknay laga. Uss ke sar ko jhataknay, baazuoun ko hawa main uchaalnay ki tarqeeb se andaza lagaya ja sakta tha keh raqs kisi khaas dhun per nahi ho raha. Bas jo jee main aa raha hai, baazuoun taangoun aur sar ke saath kiya ja raha hai. Iss hi asna main uss larki ki nazar mujh per pari aur woh foran hi apna duppatta sambhaalay bhaagti hoi aankhoun se ojhal ho gayi.
Zara aur baray hoay tou jahan pehley har waqt uchal qood zehen per sawaar rehti, ab wahan tanhaayi ki talaash rehney lagi, jo gher ki chatt per mujhay hamesha mil jaati. Shaam ka waqt aur woh badan ko cherhti hawwa mujhay behadd pasand thi. Dil chahta waqt tham jaaye. Hazaaroun, laakhoun makaanoun ke shehr main, main apney ghar ke chatt per kharra aik azeez ke meeloun dor ghar ki jaanab chehra kiey fiza main ghoorta rehta goya abhi woh shaks nigaah ke saamnay aa ker dil ko qaraar bakhsh de ga. Main maghrib tak chatt per akela betha rehta. Zehen main beshummar khayali palao banata jin ka tazkra kuch munaasib nahi. Allah o Akbar hotay hi gharoun main battiyaa'n roshan ker di jaatien. Woh manzar seher angaiz lagta.
Yaadain an-ginnat hain. Do dahaaiyoun per muheet zindagi ko aik nishist main bhala kaisay sameta jaaye?! Abhi tou mainey chotay ghar main araam-deh zindagi ki baat nahi ki! Abhi tou Sargodha main Maamu ke aasaibzada ghar aur un ke bachoun ke saath zindagi ke yaadgaar-tareen saaloun ka ziker nahi hoa! Abhi tou uss raat ki baat nahi ho saki jab aik shart haarnay per mujhay aur merey Maamu-zaad ko Chiniyot ki andheri raat main aik qabarustaan ke beechoun beech Assalam o Alaika ya Ehhlal Qaboor kehtey guzarna tha! Chiniyot ki uss sard raat ka qissa baki hai jab sab bachay aik kamray main jamma, razaaiyoun main ghusay aik dosray ko bhootoun ki kahaaniyaa'n suna rahay thay aur behen ki nazr khirki se baahir pari aur khoofnaak cheekh us ke halak se nikli, sab ki nazrain khirki se baahir daikhnay lagien aur sab hi chand lamhoun ko sehem gaye. Baad main khula keh jis lehraatay saaye ko hum kisi bhoot ka perahen samajh rahay thay woh darasal Ghazi ke Alam ka phurera tha. Garmiyoun ke chuttiyoun main Maamu-zaad bhaiyoun ke saath guzaaray gaye haseen bachpan ka bayaan na mumkin hai. Taweel, khaamosh dopeheroun main ghulail bana ker paroosiyoun ke gharoun ke derwaazoun per patharoun ki baarish....Dadi ki puraani Urdu, un ka pursakoon kamra, unki naram goud jahaan tabiyat ki kharabi ki sorat main, main apna sar rakh deta aur woh najaanay kitni dair tak dua parh parh ker mujh per dam kerti rehtien. Yeh sab baatain ab khuaab hoien. Na ab woh bachpan aaye ga, na hi woh muhabbat ke peker. Dadi ko guzray das saal ho gaye. Ager woh hayyat hotien, tou sawal hi paida na hota keh main aaj ghar se saat samandar paar betha hota. Woh hum sab ko har waqt apni muhabbat aur duaaon ke hassar main qaid rakhtien. Tayya apni zindagi ke aakhir main hum logoun se khafa ho gaye. Itna pyaar diya unhoun ne, shayed yeh kuch arsay ki naraazgi unka haq tha.
Yeh saari baatain, aur in jaisi dhairoun aur yaadain, zindagi ka sarmaya hain. Yeh woh khoobsorat jhilmil jhilmil kertey jugnoo hain jo meri aanay wali zindagi ki tareek aur kathin raatoun main mujhay roshni dain ge, mujhay rasta dikhaaein ge. Yeh jugnoo taadaad main ab barh nahi saktay, laikin mujhay yaqeen hai, in ki taadaad kabhi kam bhi na ho gi.
Ramzan tammam duniya ke musalmaanoun ke liey Jannat ki wa'eed le ker aata per bachpan main, mujhay Ramzan se aik shikaayat hoti. Mujhay dhool ki awaaz se shadeed dar lagta. Raat ke kisi peher jab Dhol Wala muhaalay main dhol peet-ta daakhil hota tou us ki dhamak merey nanhay se dil per dehshat paida kerti aur main Amma Abba ke darmiyaan, bister main aur dabak jaata. Razaayi sar tak ker leta. Amma uth ker kamray se jaatien tou chahtay hoay bhi na rok pata aur udher woh zaalim Dhol Wala aur qareeb aa raha hota. Abba ka ro'b, dhol ki wehshatnaak thaap ke aagay haar jata aur main yaklakht uchal ker Abba ke behad qareeb ho jata. Kabhi kabhi iss uchalnay se Abba bhi bedaar ho jatay, merey gaal per apna garam, shafqat bhara haath phertey aur phir aankhain band ker letey.
Eid hum sab apnay Tayya ke kartay jo Jaranwala muqeem thay. Bachoun ko shayed hi itna uns kisi aur se hota ho jitna bakroun, dumboun se hota hai. Aik baar main Eid ki subah so ker utha. Chappal pehnay baghair hi baahir baagh main apnay bakray ki ziyaarat ko pohancha. Kia dekhta houn keh qassayi bakray ke sar-bureeda tan ko darakht se latka raha hai. Main waheen phoot phoot ker ronay laga. Sarpat ander dora Tayya ke paas aur un se lippat ker hichkiyoun main shikayat kerney laga "Us banday ne mera Bakka (bakra) tor dia! Us banday ne mera Bakka..." Jaranwala se buhteri yaadain jurri hain. Sardiyoun ki chuttiyaa'n bhi waheen guzartien. Subah sawerey Tayyi ke haath ke banay parathay, desi ghee aur cheeni ke saath khaanay ka lutf hi alag tha. Hum sab bachay rasoyi main, Tayyi ke gird peerhiyoun per baith jaatay. Woh taway se garma garam parathay utaar ker hum bhookoun ko diey jaatien aur hum masoom katooroun ki maanind sab chat ker jaatay. Tayya nehaayat shafeeq thay. Shaam ko un ke aanay se kuch dair pehley, hum sab baagh main darakht per charh jaatay aur tiktiki baandhay uss kachhi sarak ko dekhay jaatay jis ke dosray sirray se Tayya kuch dair baad apni cycle per namoodar hotay. Sab bachay unhain pukaarnay lagtay. Phir darakht se utartay aur gher ke baagh se nikal ker aandha dhund Tayya ki jaanib bhaagtey. Sab ki khaahish hoti keh woh sab se pehley Tayya se ja liptain.
Garmiyoun ki shaam thi. Bijli chali gayi aur main ne andherey main khud ko chot laga li. Kahan lagi, ab yaad nahi. Zaar-o-qataar ronay laga. Tayya apni goud main utha ker baahir le gaye.Colony main makaanoun ki do-tarfa qataar ke beechoun beech ghaas phoons aur be-haiyat darakhtoun ka aik silsila tha jo door tak chala gaya tha. Tayya, mujhay goud main uthaaye, us ghaas phoons ke saath saath tehelney lagay. Main uss surmayi shaam main, kisi aur ke saath us jagah hota tou sehem jaata, per main Tayya ke mazboot aur shafeeq baazuoun main tha. Andhera dheerey dheerey utarnay laga aur phir najaanay kahan se un darakhtoun ke darmiyaan sainkaroun jugnoo aa ker jagmag jagmag karnay lagay. Merey chehray per hairat aur khushi ke milay julay aassar daikh ker Tayya un darakhtoun main ghus gaye aur main un ki goud se hi jugnoo pakarnay ki nakaam koshish main apni saari chotain bhool gaya.
Kuch baray hoay tou patangbaazi ka junoon ki hadd tak shoq ho gaya. Amma Abba ki daant dapat ne bhi is shoq main kuch kami na ki. Gher main sab baray dopeher ke khaanay ke baad qelola karnay ke paband thay. Humain bhi bister main dabaknay ka hukam milta aur hukam ki tameel bhi hoti...magar sirf dosroun ke aankh lagnay tak. Jaisay hi yaqeen hoa keh ab sab so chukay, main dabbay paaon zeena charhta aur June, July ki tapti dopeherain bhi mujhay dor aur patang se judda kerney main nakaam rehtien. Ghar se kuch faaslay per aik buland paani ki tunki thi. Koi paech lagaanay wala na hoa tou us tunki per bethay parindoun ko patang se tang kerney laga. Saari saari dopeher is hi shughal main beet jaati. Dhoop se rang siyaah ho jata. Tilwaar jaisi taiz dhaar dor ungliyoun ko taar taar ker deti. Mehboob ki jafakaariyaa'n lazzat-bakhsh hoti hain, aur woh zaalim dor abhi bhi meri mehboob hai.
Tayya retire hoay, tou Abba ne Lahore bulwaya liya. Itna bara gher bhalla kis kaam ka! Go keh Tayya ke teenoun baitay hum sab bachoun se baray thay, per tab bhi un ke hamrah bohat lutf aata. Pehley hum do bhai hotay cricket khelno ko, ab teen ka izaafa ho gaya. Kabhi pataangbaazi ho rahi hai tou kabhi gaindbaazi, ballaybaazi. Kabhi raat ko ghoomnay jaya ja raha hai, tou kabhi Abba se chup ker VCR per koi film dekhi ja rahi hai. Jo kaam hum Abba se dartay na ker saktay, ab Tayya-zaadoun ki aarh main ker letey. Chatt per kamray thay, jin ke khirkiyaa'n naazuk sheeeshoun ki thien. Hum haftay main kam-az-kam aik sheesha tou zaroor tor detey. Kabhi cricket kheltay hoay, kabhi football kheltay hoay. Abba dekhtey tou shaamat aati, jhirkiyaa'n partien, per hum shaitaan zyada assar na letey aur sheeshay tootnay ka silsila joun ka toun jaari rehta.
Ghar ki chatt se mera shuru se hi khaas taaluq raha. Khaila bhi chatt per, perha bhi chatt per. Sardiyoun ki dhoop main kinno bhi chatt per. Chatt se Minaar-e-Pakistan, Badshaahi masjid ke minaar, Data Darbaar ke minaar aur dosray tareekhi-o-mazhabbi muqaamat nazar aatay, jo waqt ke saath saath barhti hoi abadi aur gard-o-ghubaar ke baais nazar aana band ho gaye. Jab kabhi barish ke baad matla saaf hota tou door...gharoun ki chattoun ke ooper un shahkaaroun ki mojoodgi ka mubham se shaaiba hota. Aik dopeher khoob barish baras rahi thi. Main hasb-e-mamool chatt per chaajoun barastay baadal ke mazay le raha tha. Achanak kuch door hi aik koothay per nazar pari tou kia dekhta houn aik larki duniya jahaan se bekhabar barish main bheegti hoyi, naachnay main magan hai. Woh aik bohat hi be-hangam raqs tha. Aik tanha, barish main bheegti larki ka romaan angaiz khayal, kisi bhi larkay ke zehen main bhonchaal laanay ke liey kafi hai. Magar umer ke uss dor main mera zehen pak tha. Kisi behooda wahiyaat khayal ne zehen ki jheel ko paraganda na kia tha. Main bohat ishteyaaq se uss chulbuli larki ko taknay laga. Uss ke sar ko jhataknay, baazuoun ko hawa main uchaalnay ki tarqeeb se andaza lagaya ja sakta tha keh raqs kisi khaas dhun per nahi ho raha. Bas jo jee main aa raha hai, baazuoun taangoun aur sar ke saath kiya ja raha hai. Iss hi asna main uss larki ki nazar mujh per pari aur woh foran hi apna duppatta sambhaalay bhaagti hoi aankhoun se ojhal ho gayi.
Zara aur baray hoay tou jahan pehley har waqt uchal qood zehen per sawaar rehti, ab wahan tanhaayi ki talaash rehney lagi, jo gher ki chatt per mujhay hamesha mil jaati. Shaam ka waqt aur woh badan ko cherhti hawwa mujhay behadd pasand thi. Dil chahta waqt tham jaaye. Hazaaroun, laakhoun makaanoun ke shehr main, main apney ghar ke chatt per kharra aik azeez ke meeloun dor ghar ki jaanab chehra kiey fiza main ghoorta rehta goya abhi woh shaks nigaah ke saamnay aa ker dil ko qaraar bakhsh de ga. Main maghrib tak chatt per akela betha rehta. Zehen main beshummar khayali palao banata jin ka tazkra kuch munaasib nahi. Allah o Akbar hotay hi gharoun main battiyaa'n roshan ker di jaatien. Woh manzar seher angaiz lagta.
Yaadain an-ginnat hain. Do dahaaiyoun per muheet zindagi ko aik nishist main bhala kaisay sameta jaaye?! Abhi tou mainey chotay ghar main araam-deh zindagi ki baat nahi ki! Abhi tou Sargodha main Maamu ke aasaibzada ghar aur un ke bachoun ke saath zindagi ke yaadgaar-tareen saaloun ka ziker nahi hoa! Abhi tou uss raat ki baat nahi ho saki jab aik shart haarnay per mujhay aur merey Maamu-zaad ko Chiniyot ki andheri raat main aik qabarustaan ke beechoun beech Assalam o Alaika ya Ehhlal Qaboor kehtey guzarna tha! Chiniyot ki uss sard raat ka qissa baki hai jab sab bachay aik kamray main jamma, razaaiyoun main ghusay aik dosray ko bhootoun ki kahaaniyaa'n suna rahay thay aur behen ki nazr khirki se baahir pari aur khoofnaak cheekh us ke halak se nikli, sab ki nazrain khirki se baahir daikhnay lagien aur sab hi chand lamhoun ko sehem gaye. Baad main khula keh jis lehraatay saaye ko hum kisi bhoot ka perahen samajh rahay thay woh darasal Ghazi ke Alam ka phurera tha. Garmiyoun ke chuttiyoun main Maamu-zaad bhaiyoun ke saath guzaaray gaye haseen bachpan ka bayaan na mumkin hai. Taweel, khaamosh dopeheroun main ghulail bana ker paroosiyoun ke gharoun ke derwaazoun per patharoun ki baarish....Dadi ki puraani Urdu, un ka pursakoon kamra, unki naram goud jahaan tabiyat ki kharabi ki sorat main, main apna sar rakh deta aur woh najaanay kitni dair tak dua parh parh ker mujh per dam kerti rehtien. Yeh sab baatain ab khuaab hoien. Na ab woh bachpan aaye ga, na hi woh muhabbat ke peker. Dadi ko guzray das saal ho gaye. Ager woh hayyat hotien, tou sawal hi paida na hota keh main aaj ghar se saat samandar paar betha hota. Woh hum sab ko har waqt apni muhabbat aur duaaon ke hassar main qaid rakhtien. Tayya apni zindagi ke aakhir main hum logoun se khafa ho gaye. Itna pyaar diya unhoun ne, shayed yeh kuch arsay ki naraazgi unka haq tha.
Yeh saari baatain, aur in jaisi dhairoun aur yaadain, zindagi ka sarmaya hain. Yeh woh khoobsorat jhilmil jhilmil kertey jugnoo hain jo meri aanay wali zindagi ki tareek aur kathin raatoun main mujhay roshni dain ge, mujhay rasta dikhaaein ge. Yeh jugnoo taadaad main ab barh nahi saktay, laikin mujhay yaqeen hai, in ki taadaad kabhi kam bhi na ho gi.
4 comments:
*smiles*
Beshak yeh saaray jugnoo zindagi ka sarmaya hain... aur bohat khushnaseeb hain woh loug jin ke paas yeh sarmaya hai.
... Aur kion nahin barh sakte yeh jugnoo tadaad mein?? Bilkul barh saktay hain, aur barhaingay!! InshaAllah. Aur na he anay wali zindagi ki raatain tareek hongi janab!
Achay bachay aisi mayoosi ki baatain nahin karte! *smiles*
Aap ki naik tammanaaon ka shukria, per mera matlab un jugnoo'on se tha jo keh mainey bachpan main ikathay kiey. Jab bachpan hi nahi aana tou woh jugnoo kaisay barh saktay hain! :)
Aap ko ghalat fehmi hoi hai. Na main mayoos houn, aur na hi acha bacha. :D
Khush rahiey.
Hmmm... agreed. That'd be true, I suppose.
Aap ko ghalat fehmi hoi hai. Na main mayoos houn, aur na hi acha bacha.
..... *facepalm*
P.S. Forgot to mention earlier- Guess who has a way with words?!
Beautiful prose!
Thank you! :)
Post a Comment