Dast-e-ALI main aa ke machalti thi Zulfiqaar
Sholay sitam-garoun pe ugalti thi Zulfiqaar
Maidaa’n main apna rang badalti thi Zulfiqaar
Nasloun ko dekh dekh ke chalti thi Zulfiqaar
Unwaan thi jo Ahl-e-Wafa ke sakoon ka
Dhabba nahi tha us pe ghareeboun ke khoon ka
Gher main ALI ke aayi thi Emaan ki tarhan
Dushman pe thi nigaah nigehbaan ki tarhan
Utri thi aasmaan se Quran ki tarhan
Shaamil thi Ahl-e-Bait main Salman ki tarhan
Ismat ki baargaah main labb kholnay lagi
Folaad ki zaba’n thi magar bolnay lagi
Din ko ALI ke haath main rehti thi shola-rooh
Raatoun ko uth ke dhootien thi jab FATIMA l’hu
Ismat ki baargaah main phir ho ke ba-wuzu
Kerti thi uth ke Bint-e-Paighambar se guftugu
Thi raazdaar-e-jang akeli BATOOL ki
Talwaar thi ALI ki seheli BATOOL ki
---------------------------------------
Liey hai Taigh Sheh-e-Qala-Geer ka Waris
Namood-e-Qu’wat-e-Naan-Sha’eer ka Waris
Nabi ka Laal, Janab-e-Ameer ka Waris
Nikal ke aaye ga jis din Ghadeer ka Waris
Zubaan-e-Taigh bataaye gi Izz-o-Shaan-e-Ghadeer
Kaheen panah na paaien ge dushmanaan-e-Ghadeer
Uthay ga shor saf-e-kaarzaar se bhaago
Baras rahi hai Ajal, Zulfiqaar se bhaago
Koi kahay ga nikal ker mazaar se bhaago
Sada kisi ki Nabi ke deyaar se bhaago
Qaba-e-Zulm-o-Tashaddud ko phaarnay wala
Phir aa gaya Dar-e-Khyber ukhaarnay wala
Ali ke Taigh hai phir be-nayaam bhaag chalo
Ajal ko yaad hain hum sab ke naam bhaag chalo
Jagah haram main nahi soo’ay Shaam bhaag chalo
Keh bhaagna hii tou hai apna kaam bhaag chalo
Amaa’n nahi hai kaheen kaarzaar-e-hasti main
Kacchaar chorr ke Sher aa gaya hai basti main
ALI kahain ge Najaf se keh Marhaba Beta
Terey nisaar teri jang per fida Beta
Bachay na aaj koi baani-e-jafa Beta
Nikaal de Dil-e-Haider ka hosla Beta
Main Hadd-e-Sabar main tha kaarzaar Teri hai
Mujhay mili thi magar Zulfiqaar Teri hai
---------------------------------------
P.S. Eid Mubarik :)
1 comments:
subhanAllah.
Post a Comment